Sulat Para Kay Pilipinas

Kumusta ka na?

Balita ko nahihirapan ka,

Patawad wala akong magawa.

Hindi ko man lang mapahiran ang ‘yong mga luha.

Minsan kitang tinalikuran

Nabulag sa tingkad ng kanluran;

Iniwan kang sugatan at nagdurusa

Sa giyerang ako din ang may likha.

Damdamin mo ay aking sinaktan

Ipinagpalit ka sa sariling kadakilaan

Naging palalo sa kalayaang tinatamasa

Hinayaan ka sa putik ng karahasan.

Ikaw ngayon ay tila laruan

Pinapaikot sa palad ng mga dayuhan;

Ngunit ang mas masakit na katotohanan

Ang minsan mong inaruga

Sayo ngayon ay lumalapastangan.

Minahal mo ako at hindi pinabayaan

Sukli ko ay walang habas na pagbabalewala;

Ipinagkanulo ang iyong kagandahan

Hanggang kailan kita matitiis?

Patawad aking sinisinta

Sa mga kamay ko nalugmok ka

Paano ko mababawi ang iyong dangal?

Patawad Pilipinas kong mahal!

-Juan De la Cruz